Selim Marevci, shefi i kabinetit të kryetarit të Ferizajt, Agim Aliu, ka thënë se Qeveria aktuale në krye me Albin Kurti, duke u kujdesu që të dal mirë në statistika po rrënon ekonominë e vendit.
Ai ka shtuar zvarritja e aktivizimit të OSHP-së ka bërë që shumë kompani të jenë buzë falimentimit
“Në kuadër të kujdesit të tyre për statistikat e jo për mirëqenien qytetare, të lartcekurit, duke vakërruar aktivizimin e OSHP-së (Organin Shqyrtues të Prokurimit) diku rreth mbi 500 milion euro i kanë ndalë nga qarkullimi, e si rrjedhojë disa kompani janë pranë falimentimit. Akoma më keq, nga zvarritja e përzgjedhjes së anëtarëve të OSHP-së dhe ndalimi i qarkullimit të shumë miliona eurove, të rinjtë po i humbin vendet e tyre të punës dhe me çdo kusht duan që të largohen nga vendi”, thekson Marevci.
Marevci vendimin e qeverisë për ndarjen e 100 eurove e ka cilësuar “lëmoshë”, përcjell Paparaci.
Sipas tij Qeveria po ndalon projektet me qëllim që të ndaloj korrupsionin siç shkruan ai “nga të ngarkuarit e tyre”.
“Gjithashtu, qeveria aktuale, duke mos iu besuar njerëzve të tyre, të cilët i ka ngarkuar me detyra, ka marrë vendime për ndalimin e shumë projekteve, duke tentuar të parandaloj korrupsionin pikërisht nga të ngarkuarit e tyre. Pezullimet e kontratave të nënshkruara nga operatorët ekonomik dhe institucionet e shtetit do të kenë implikime të thella buxhetore, ngase operatorët do ta padisin shtetin së paku për dy arsye: për planin dinamik të kryerjeve të punës, si dhe për imazhin e rrënuar të kompanive të tyre”, shton ai.
Shefi i kabinetit të Agim Aliut, shkruan se Kurti po tenton që korrupsionin ta luftojë me statistika manipuluese.
Ai ka përmendur edhe skandalin e punësimeve në KEK të publikuar nga Paparaci.
“Mirëpo, tashmë e kemi kuptuar hilen tënde, ti, Kryeministër, edhe korrupsionin dëshiron ta luftosh vetëm në statistika manipuluese e jo në të vërtetë dhe për këtë gjë dëshmojnë përgjimet e dala për njerëzit më të afërt të tu dhe keqpërdorimi me konkurset për vende të punës, e sidomos ai në korporatën energjetike”, shkruan tutje ai.
Krejt në fund ai ka theksuar se Kurti duhet t’i kthehet luftimit të korrupsionit sepse ndryshe të rinjtë po ikin nga vendi.