Kryetari i Federatës së Futbollit të Kosovës, Agim Ademi është shprehur se federata është e gatshme për rritjen e kapaciteteve në stadiumin “Fadil Vokrri”.
Sipas Ademit, rritja e kapaciteteve mund të bëhet për 8 mijë ulëse, vetëm se shtëpia e futbollit kosovar është duke pritur përgjigje nga institucionet përkatëse për ta realizuar projektin.
Momentalisht, stadiumi “Fadil Vokrri” ka një kapacitet prej 13.500 ulëseve, teksa është i vetmi stadium kosovar i pranuar nga UEFA.
Vetëm gjatë muajit korrik, në “Fadil Vokrri” do të zhvillohen katër ndeshje evropiane. Ekipet kosovare do të zhvillojnë ndeshjet e tyre për rrethin e parë kualifikues.