Presidentja e Kosovës, Vjosa Osmani ka falënderuar Kancelarin e Republikës Federale të Gjermanisë, Olaf Scholz, pas takimit me të në margjinat e Samitit të Bashkimit Evropian të enjten.
Osmani, në një deklarim në Facebook në një kohë kur po vijojnë punimet e Samitit, tha se kancelari Scholz është një përkrahës i palëkundur i Republikës së Kosovës.
Shefja e shtetit e falënderoi kancelarin gjerman në emër të popullit të Kosovës.
“Me Kancelarin Scholz, i cili si gjithnjë është përkrahës i palëkundur i Republikës së Kosovës dhe perspektivës sonë evropiane. Në emër të popullit të Kosovës, faleminderit”, deklaroi presidentja Osmani.
Në selinë e Bashkimit Evropian (BE), ka nisur Samiti BE-Ballkani Perëndimor ku 27 krerë shtetesh dhe qeverish evropiane po diskutojnë me kolegët e tyre nga rajoni mbi sfidat, me të cilat përballen së bashku, veçanërisht në dritën e agresionit rus kundër Ukrainës.
Nga Kosova në këtë takim po merr pjesë presidentja Vjosa Osmani.
Para samitit, Osmani u tha gazetarëve se Kosova synon që në samit të theksojë që e ka vendin në Bashkimin Evropian.
“Ne e kemi vendin këtu, në mes të familjeve të kombeve evropiane, ku kemi kontribuar me shekuj. Ne kemi nevojë një mesazh të unifikuar të BE-së për Ballkanin Perëndimor, sepse sa më shumë hapësirë të lihet për keqdashësit, natyrisht që do ta përdorin”, tha Osmani.
Pritjet e opinionit kosovar nga samiti kanë të bëjnë me liberalizimin e vizave, pasi Kosova është i vetmi vend në rajon, qytetarët e së cilës nuk gëzojnë lirinë e lëvizjes.
Vërehet se ka rritje të mbështetjes që liberalizimi të bëhet sa më shpejt, por nuk ka pasur indikacione konkrete se kjo do të mund të përfshihej edhe në dokumentet e samitit.