Kryeministri Albin Kurti, së bashku me ministrat Rozeta Hajdari, Artane Rizvanolli, Hekuran Murati dhe Liburn Aliu, takoi anëtarët e Bordit të Organit Shqyrtues të Prokurimit (OShP), të votuar gjatë javës së kaluar në Kuvendin e Kosovës.
Të enjten, Kuvendi i Kosovës zgjodhi Bordin e Organit Shqyrtues të Prokurimit pas 15 muajve që kur ky institucion nuk ishte funksional.
Sipas ZKM-së, gjatë takimit, Kurti theksoi rëndësinë e fuqizimit të sundimit të ligjit përmes zbatimit të drejtë të dispozitave ligjore në fuqi.
Për më tepër, Kryeministri potencoi përgjegjësinë që anëtarët e këtij Bordi kanë dhe nevojën e domosdoshme për të garantuar transparencë, dhe për të dëshmuar profesionalizëm dhe integritet në ushtrimin e detyrës.
Së bashku me ministrat e kabinetit qeveritar, Kryeministri shprehu nevojën e dëshmimit të pavarësisë së plotë të punës së Bordit, nga të gjitha strukturat dhe pushtetet e vendit.
“Vetëm veprimi i atillë mund të shkojë në dobi të fuqizimit të shtetit ligjor dhe kthimit të besimit të qytetarëve, bizneseve e investitorëve në Organin Shqyrtues të Prokurimit”, thuhet në njoftimin e Zyrës së Kryeministrit.
Kryetare e bordit të “Gjykatës së Tenderëve” u zgjodh Vjosa Gradinaj-Mexhuani, ndërsa anëtarë Nita Bejta, Kimete Gashi, Vedat Pterqoj dhe Agon Ramadani.
Nita Bejta dhe Agon Ramadani ishin propozuar direkt nga Qeveria e Kosovës pa qenë pjesë e konkursit.