Qeveria e Kosovës dhe ajo e Luksemburgut së shpejti do të nënshkruajnë marrëveshje dhe memorandum bashkëpunimi nëpërmjet së cilës parashihet përkrahja e Kosovës me 35 milionë euro.
Kështu ka njoftuar Zyra e Kryeministrit, pas takimit që Albin Kurti ka pasur sot me ambasadorin jo-rezident të Luksemburgut në Kosovë Patrick Heck.
“Në muajin e ardhshëm pritet nënshkrimi i marrëveshjes së re bilaterale dhe memorandumit të bashkëpunimit me Qeverinë e Luksemburgut që parasheh përkrahjen financiare për Kosovën në vlerë prej 35 milionë euro”, njofton ZKM-ja.
Tutje në njoftim bëhet e ditur se Luksemburgu që nga paslufta ka përkrahur Kosovën me mbi 100 milionë euro.
“Luksemburgu është një nga shtetet e para që ka njohur pavarësinë e Kosovës dhe që nga paslufta e ka përkrahur Kosovën përmes programeve të ndryshme zhvillimore në fushën e arsimit profesional, shëndetësisë, fuqizimit të shoqërisë civile dhe procesit të integrimeve evropiane, që e tejkalojnë vlerën prej 100 milionë euro”, shkruhet tutje në njoftim.
Në komunikatën për media u bë e ditur se gjatë takimit u dha zotimi i dyanshëm për avancim të bashkëpunimit ekonomik dhe rritje të shkëmbimeve tregtare në mes dy vendeve, ndërkaq u veçua edhe potenciali për bashkëpunim në sektorin e Teknologjisë së Informacionit dhe Komunikimit.