Lëvizja Vetëvendosje këtë të diele ka përmbyllur zgjedhjet e brendshme ku zgjodhi kryetarin e ri të kësaj partie dhe udhëheqësit e qendrave. Ndonëse ishin zgjedhje të reja, Lëvizja Vetëvendosje, zgjodhi në krye të saj kryetarin e vjetër.
Albin Kurti fitoi me 98.60 për qind të votave për edhe një mandat në krye të partisë së tij. Kurse, Albulena Haxhiu u zgjodh kryetare e Forumit të Gruas dhe Behar Jashari si i Rinisë.
Me kryetarin e vjetër, të rizgjedhur për të udhëhequr partinë, Lëvizja Vetëvendosje mes pakënaqësive të shumta brenda saj, ka shënuar numrin më të vogël të anëtarëve që kanë shfrytëzuar të drejtën e tyre për të votuar, ka mësuar Paparaci nga burime të afërta me LVV-në.
Në qendrën më të madhe të kësaj partie në Prishtinë nga gjithsej 6500 anëtarë sa janë të regjistruar të drejtën e tyre për të votuar e kanë shfrytëzuar 1100 anëtarë.
Siç ka mësuar Paparaci vetëm 5 për qind e këtyre votuesve kanë votuar kundër Arben Vitisë.
Pak ka marrë edhe Armend Muja. Vetëm 350 anëtarë kanë votuar për të në Mitrovicë, ani pse dega e Lëvizjes në këtë qytet numëron afër 5000 anëtarë.
Numër të vogël të votave ka marrë edhe Shpejtim Bulliqi në Podujevë. Nga 5600 anëtarë sa numëron dega e kësaj partie, vetëm 320 kanë votuar për Shpejtim Bulliqin.
Kurse në Lipjan pro Adnan Rrustemit kanë votuar vetëm 300 anëtarë nga gjithsej 3 mijë anëtarë sa numëron dega e VV-së në këtë komunë.
Sipas burimeve të Paparacit në degën e LVV-së në Ferizaj 310 anëtarë të kësaj partia kanë votuar kundër emërimit të Fatbardha Reka Zogajt si kryetare e qendrës.
Kurse, 423 nga gjithsej 4600 anëtarë kanë votuar pro emërimit të saj në këtë pozitë.
Fat më të mirë në grumbullimin e votave nuk ka pasur as tashmë kryetari i kësaj qende, Arsim Ademi.
Për këtë të fundit nga gjithsej 2100 anëtarë sa dega e kësaj partie në këtë komunë, vetëm 207 kanë votuar pro tij.