Charles Smith, është caktuar një nga anëtarët e trupit gjykues që do t’i gjykojë krerët e UÇK-së, Hashim Thaçin, Kadri Veselin, Rexhep Selimin e Jakup Krasniqin, të cilët po mbahen në burgun e Hagë, të akuzuar për krime lufte.
Smith ishte në trupin gjykues në rastin e “Grupit të Drenicës”, të cilëve gjyqtarët e EULEX-it i referoheshin si kafshë që duhej zbutur, raporton Paparaci.
Gjyqtari Charles L. Smith është i vetmi amerikan që është zgjedhur për të qenë njëri nga 19 gjyqtarët në Gjykatën Speciale që do të gjykojë krimet e kryera në Kosovë.
Ish-kryetari i Asamblesë së Gjyqtarëve të EULEX-it, Malcolm Simmons, i kishte shkruar një letër kryeministrit të Kosovës, Albin Kurti, me anë të së cilës i ka kërkuar që t’i mundësohet raportimi në Kuvend për ato që ai i cilësonte si skandale të misionit Evropian për Sundimin e Ligjit në Kosovë.
Pra, Simmons kishte paditur drejtuesit më të lartë të EULEX-it, dhe ka hedhur shumë dyshime me prova se ky mision ka qenë gjithçka tjetër pos, mision i drejtësisë.
Mes të paditurve janë Mats Mattson, Gerrit Sprenger dhe Charles Smith. Smith, i cili do t’i gjykojë ish-krerët e UÇK-së.
Kryetarja e Gjykatës Speciale në Hagë, e ka caktuar trupin gjykues që do ta trajtojë rastin e Hashim Thaçit, Kadri Veselit, Rexhep Selimit e Jakup Krasniqit.
Katër gjyqtarët që do ta trajtojnë rastin kryesor në Gjykatën Speciale janë: Charles Smith, Christoph Barthe, Guenael Metraux dhe Fergal Gaynor gjyqtar rezervë.
Këta katër gjyqtarë janë me nacionalitete të ndryshme: Charles Smith që ishte kryetar i trupit gjykues në rastin e Nasim Haradinajt dhe Hysni Gucatit është nga Shtetet e Bashkuara të Amerikës.
Kristof Barte është nga Gjermania, Guenal Metraux është nga Zvicra dhe gjyqtari rezervë Gyanor është nga Irlanda.
Çështja e Thaçit dhe të tjerëve do të kalojë te trupi gjykues më 15 dhjetor. Për këtë sot ka bërë njoftim gjyqtari i procedurës paraprake Nicolas Giju.