Kryetari i Partisë Demokratike të Kosovës, Memli Krasniqi i cili ndodhet në Bruksel, ka takuar atje Raportuesen për Kosovën në Parlamentin Evropian, Viola von Cramon.
Në një status në llogarinë e tij në Facebook, Krasniqi ka thënë se me von Cramon diskutuan për zhvillimet në Kosovë dhe situatën politike në vend.
“Me këtë rast, u dakorduam për rëndësinë e miratimit së fundmi nga Parlamenti Evropian të rekomandimit për Strategjinë e Re të BE-së për Zgjerim”, ka shkruar kreu opozitar, duke shtuar se nga raportuesja ka kërkuar mbështetje të mëtutjeshme për liberalizimin e vizave për Kosovën.
“Duke e falënderuar për mbështetjen e deritanishme për Kosovën, eurodeputetes Cramon i kërkova që të vazhdojë avokimin konsistent të saj në përmbylljen e liberalizimit të vizave për qytetarët e Kosovës, posaçërisht tani pas rekomandimit pozitiv nga ambasadorët e vendeve të BE-së”, ka thënë Krasniqi ndër tjerash.