Kryeministri Albin Kurti ka thënë në një intervistë për gazetën kroate “Veçerenji List” se sa i përket zgjedhjeve të fundit lokale në Kosovë, ka pritur rezultat më të mirë, përcjell Paparaci.
Tutje, Kurti në intervistën me gazetarin, Hassan Haidar Diab ka thënë se kanë qenë dy faktorë që kanë ndikuar në rezultatin jo të kënaqshëm të Lëzizjes Vetëvendosje në zgjedhjet lokale të këtij viti.
“Tani po bëjmë një lloj analize të brendshme për mangësitë strukturore dhe organizative, të cilat sigurisht janë shkaku i rezultatit jo të kënaqshëm”, ka theksuar Kurti për gazetën kroate.
Ndërkaq, përsa i përket faktorit të dytë, kryeministri i Kosovës ka thënë se “ka pasur një lloj bashkimi, koordinimi të madh të gjithë të tjerëve kundër LVV-së”.
“Besoj se këta dy faktorë përcaktuan një rezultat të keq për ne. Por, atje ku jemi në opozitë, do të ndërtojmë një opozitë të mirë dhe të fortë, ndërsa atje ku jemi në pushtet, do të krijojmë një qeveri të mirë dhe efikase”, tha Kurti.