Seanca e Kuvendit të Kosovës ka nisur me përplasje mes deputetëve, raporton Paparaci.
Protagonistë për këtë ‘sherr’ ishin deputetët e PDK-së, Ferat Shala dhe ajo e Lëvizjes Vetëvendosje, Saranda Bogujevci, e cila po e kryeson seancën plenare.
Shala fillimisht e mori fjalën në foltoren e Kuvendit duke përmendur për problemet e energjisë dhe kërkesën e Qeverisë Kurti.
“Është obligim që ministrja se pse e ka shfuqizuar rregulloren e investitorëve strategjikë. Në rend dite është shfuqizimi i rregullores për investitorët strategjikë. Ju po thoni çka ka lidhje kjo me energjinë? Të vetmin akt juridik, e keni shfuqizuar me unanimitet të plotë në mbledhjen e qeverisë dhe nuk iu keni dhënë përgjigje investitorëve”, tha ligjvënësi i opozitës në fjalën e tij dy-minutëshe.
Por, kjo sipas tij nuk ishte e mjaftueshme dhe kërkoi edhe disa sekonda shtesë.
Megjithatë, ai u shpreh i nervozuar duke thënë se ‘nuk e lëshoj foltoren pa ma dhënë fjalën’, teksa iu tërhoq vëmendja nga kryesuesja Bogujevci.
Ajo s’e kuptoi sjellën e Shalës dhe e luti atë që të tregojë respekt.
“Jemi duke diskutuar për rendin e ditës, vetëm një sekondë, të lutëm pak respekt. Në momentin që futet në rendin e ditës këtë pikë, e ki radhën e diskutimit”, tha ajo.
“Kur të mësoheni me respektu dikë tjetër t’i jap 30 sekonda. S’e kuptoj sjelljen që e ki. Do ia jap fjalën dhe vazhdojmë, por jo me këtë sjellje”, vijoi Bogujevci.
Më pas, Shala tha se ‘PDK-ja nuk e përkrah këtë nismë të korruptuar të zhytur thellë në korrupsion dhe mafinë energjetike’.