Shtetet anëtare të NATO-s dhe Bashkimit Evropian, Estonia dhe Letonia, kanë kërkuar largimin e ambasadorëve rusë nga shtetet përkatëse, pas njoftimit të Rusisë për ulje të marrëdhënieve diplomatike me Estoninë, duke e akuzuar atë për “rusofobi totale”.
Estonia u përgjigj në mënyrë të ngjashme, me ministrin e Jashtëm Urmas Reinsalu që njoftoi se të dërguarit rus do t’i kërkohet të largohet deri më 7 shkurt.
Mosmarrëveshja diplomatike erdhi pasi ministrat e jashtëm të BE-së u takuan në Bruksel për të diskutuar, mes tjerash, agresionin e Rusisë kundër Ukrainës.
Tre vendet baltike kanë qenë të zëshme për të kërkuar sanksione më të ashpra për Rusinë, si dhe ndihmë më të mirë për Ukrainën.
Estonia, Letonia dhe fqinji i tyre baltik Lituania, kanë qenë pjesë e shteteve aleate në NATO që kanë insistuar fuqishëm që Gjermania të sigurojë tanke luftarake Leopard për të ndihmuar Ukrainën që t’i rezistojë pushtimit rus.