Boksierja kosovare, Donjeta Sadiku ka publikuar një videomesazh drejtuar Qeverisë së Indisë, për ta rishqyrtuar vendimin e tyre për ndalimin e boksieres kosovare në Kampionatin Botëror të boksit.
Fillimisht Qeveria e Indisë ka refuzuar të lëshojë viza për anëtarët e delegacionit kosovar, kurse më pas ka paraqitur kushtin për prezantim pa simbole. Një kusht i tillë nuk është pranuar nga federata kosovare, që në bashkërendim me autoritetet e vendit ka vendosur që të mos udhëtohet fare për në Indi.
Përmes një videomesazh, Sadiku ka kërkuar që Qeveria e Indisë të rishqyrtojë vendimin e saj dhe ta lejojë të garojë atë me të drejta të barabarta me të gjithë sportistët tjerë.
“Përmes kësaj videoje i bëjë thirrje Qeverisë së Indisë që ta rishqyrtojë vendimin e saj dhe të më lejohet garimi me Republikën e Kosovës dhe me të gjitha të drejtat që më takojnë”, thuhet mes të tjerash në mesazhin e saj.
Sadiku kishte fituar medaljen e bronztë në botërorin e kaluar, ndërsa këtë vit ajo e ka të pamundur garimin.