Trajneri i përkohshëm i Prishtinës, Debatik Curri, ka thënë se shpreson që t’i jepet besimi nga klubi për ta udhëhequr klubin, së paku deri në përfundimin e sezonit 2022/23.
Pas triumfit në çerekfinale të Kupës së Kosovës ndaj Ballkanit, Curri u shpreh se ka dëshirë që të vazhdojë me Prishtinën si shef i shtabit teknik të bardhekaltërve.
“Unë e bëra punën maksimale. Edhe unë e dua këtë klub jam rritur këtu dhe dëshira ime është që të vazhdojë”, ka thënë ai pas përfundimit të ndeshjes së fituar nga Prishtina ndaj Ballkanit me rezultat 2-0.
Curri ka lënë të nënkuptohet se ai pritet ta udhëheqë Prishtinën edhe në ndeshjen e radhës në kampionat.
Për këtë ndeshje, ai tha se nuk e di nëse do të përzgjedhë të njëjtën 11-she sikurse në ndeshjen e sotme në Kupë, megjithatë tha se do të vlerësojë edhe njëherë gjendjen e futbollistëve.