Sot ka dështuar seanca gjyqësore ndaj kryetarit të Kuvendit, Glauk Konjufca.
Kjo për shkak të mungesës së dëshmitarëve Adem Grabovci, Ismet Beqiri e Slobodan Petroviq, të cilët kanë qenë deputet kur ka ndodhur rasti, raporton Betimi për Drejtësi.
Gjyqtarja e rastit Edita Çanta ka lëshuar urdhër që Grabovci dhe Beqiri të sillen me detyrim për të dhënë dëshmi.
Pas këtij urdhri ka reaguar avokati Besnik Berisha.
Në profilin e tij në “Facebook”, ai ka shkruar se tani ish-deputetët Grabovci dhe Beqiri mund të sillen zhag në gjykatë.
“Adem Grabovcin e Ismet Beqirin mundeni edhe zhag me i cu ne gjykate, po se di a po e zbatoni standardin e njejte edhe per pushtetaret?! Akoma ka aktakuza ne sirtar qe rendojne mbi pushtetare, por per cudi prezenca e tyre nuk sigurohet me detyrim, anipse ata e kane obligim te paraqiten se paku njehere ne gjykim. Tek ne, drejtesi e barazi para ligjit ka vetem ne ligj e kushtetute!”, ka shkruar Berisha.