Kryeministri i Kosovës, Albin Kurti është pyetur rreth qëndrimit të presidentes së Kosovës, Vjosa Osmani karshi dialogut me Serbinë dhe marrëveshjen e Ohrit, ndërsa ka thënë se nuk janë më kohët kur krerët institucionalë komentojnë deklarimet e njëri-tjetrit.
Kurti në përgjigjen e tij në konferencë ka thënë se ato janë “modele të vjetra”, teksa ka theksuar se ka shumë deklarime të presidentes për të cilat nuk e sheh të nevojshme të deklarohet.
Ai ka thënë se nuk ka nevojë të pyetet secili nga krerët institucionalë lidhur me mendimet e njëri-tjetrit.
“Ndërkaq ju duhet ta kuptoni që ne kemi fituar bashkë me 14 shkurt 2021, nuk janë më ato modelet e vjetra kur deklaron diçka kryeministri e duhet ta pyesim çka mendon presidenti, ose deklaron presidenti e çka mendon kryeministri, ka shumë gjëra për të cilat deklarohet presidentja dhe unë fare nuk e konsideroj të nevojshme që të deklarohem dhe anasjelltas, deklarohet kryeministri është si të deklarohet presidentja. Nuk është e thënë që secili udhëheqës institucional për secilën çështje, e tash çka mendon Konjufca për Ohrin, çfarë mendon Gërvalla, çfarë mendon Osmani, Kurti e zëvendësministri Bislimi, nuk ka nevojë.”, tha Kurti.
Në anën tjetër, Osmani pas marrëveshjes së Ohrit është deklaruar se Serbia po vazhdon avazin e njëjtë, të mosrespektimit të marrëveshjes dhe të qasjes destruktive në dialog. /Paparaci.com/