Anija më e famshme në botë, Titaniku, është zbuluar si kurrë më parë.
Kjo është bërë përmes skanimit digjital të anijes, që ka shpërfaqur pamje unike 3D duke e bërë të mundur që Titaniku të shihet pastër, si të ishte mbi sipërfaqe të tokës, raporton BBC.
Më shumë se 1500 njerëz vdiqën kur anija goditi një ajsberg në udhëtimin e saj të parë nga Southampton në Nju Jork.
Shpresa është se ky skanim do të hedhë dritë mbi atë që ndodhi saktësisht me anijen e Titanikut, e cila u fundos në vitin 1912.
Titaniku është eksploruar gjerësisht që nga zbulimi i rrënojave në vitin 1985. Mirëpo anija është kaq e madhe sa në errësirën e thellësisë, kamerat mund të tregojnë vetëm disa nga pamjet magjepsëse të anijes në kalbje, kurrë të gjithën.
Skanimi i ri kap rrënojat në tërësinë e tij, duke zbuluar një pamje të plotë të Titanikut. Ai shtrihet në dy pjesë, mes harkut dhe skajit, në distancë rreth 800m. Anija shpërfaqet e rrethuar edhe nga mbetje.
Skanimi u krye në verën e vitit 2022 nga Magellan Ltd dhe Atlantic Productions, të cilët po bëjnë një dokumentar për projektin.
Nëndetëset që fotografuan pamjet, u kontrolluan nga distanca nga një ekip në bordin e një anijeje të specializuar. Ato u lanë më shumë se 200 orë duke vëzhguar gjatësinë dhe gjerësinë e Titanikut.
Në fund u nxorrën më shumë se 700,000 imazhe nga çdo kënd, duke krijuar një rindërtim të saktë 3D të anijes.