Pasi u vendos kampioni në Superligën e Kosovës në basketboll, radhën tashmë e ka futbolli.
Xhiroja e 35-të mund të jetë përcaktuese për Kampionin e Kosovës në futboll për edicionin 2022/23.
Në orar për ditën e sotme janë pesë ndeshje, teksa Ballkani e ka të domosdoshme fitoren në rast se dëshiron përsëritjen e titullit të kampionit.
Aktualisht, Ballkani i ka dy pikë më shumë se Drita që ndodhet në pozitën e dytë. Por Ballkani do ta ketë të vështirë ndaj Ferizajit që i duhen me doemos pikët për të qëndruar në Superligë.
Ndërkohë, fitoren të rëndësishmen e ka edhe Drita, nëse dëshiron të shpresojë ende në titull të kampionit.
Gjilanasit duhet ta mposhtin Malishevën dhe të tentojnë në ndonjë gabim eventual të kampionit aktual të Kosovës.
Në të kundërtën, nëse Drita nuk fiton e Ballkani po, therandasit do ta festojnë qysh sot titullin e kampionit.
Dukagjini synon fitore ndaj Trepçës ’89 për ta ruajtur vendin e katërt në tabelë.
Pikët ju nevojiten edhe mitrovicasve në luftën e tyre për të mbetur në ligë.
Në ndeshjet tjera, Prishtina llogarit në fitore ndaj të dorëzuarës Drenica, kurse Llapi e pret Gjilanin.