Zëvendësministrja e Sportit, Daulina Osmani ka deklaruar se ndeshjet e futbollit të zhvilluara dje në Superligën e Kosovës janë proceduar për hetime në prokuroritë përkatëse.
Përmes një reagimi në Facebook, Osmani ka deklaruar se Këshilli për Parandalimin e Dhunës në Sport ka proceduar hetimet për ndeshjen mes Trepçës ’89 e Prishtinës dhe Ferizaj e Dukagjinit.
“Ndeshjet e futbollit që u zhvilluan dje në kuadër të Superligës së Kosovës, Prishtina me Trepçën dhe Ferizaji me Dukagjinin, që të dyja, janë proceduar për hetime në prokuroritë përkatëse nga Këshilli për Parandalimin e Dhunës në Sport. Nuk mund t’i mbyllim sytë para dyshimeve, por as edhe të jemi pre e spekulimeve. Andaj, kërkojmë nga autoritetet dhe personat përgjegjës të organeve të rendit që të procedojnë tutje me shumë kujdes, dhe me kohë”, thuhet mes të tjerash në reagimin e zëvendësministres së sportit.
Osmani ka shtuar se kalkulimet e ndryshme nuk duhet të kenë vend në sportin kosovar.
“Është e dhimbshme kur imazhi i sportit në vend njolloset me shenja që shkaktojnë dëme të thella dhe vështirë të riparueshme në komunitet.
Sporti është i sportistëve dhe atyre që punojnë për rezultate. Kalkulimet dhe llogaritë e përfitimeve mbi djersën dhe mundin e tyre, nuk duhet të kenë vend në sportin vendor në asnjë formë dhe asnjë moment”, përfundon Osmani.
Ferizaj e Trepça ’89 kanë shënuar fitore mbrëmë me disa gola qesharak që janë diskutuar mjaft shumë në opinionin kosovar për mënyrën se si janë shënuar.
Skuadra e Ferizajt ka arritur ta sigruojë barazhin e Superligës, ndërkaq 89-shi ka rënë në Ligën e Parë.