Analisti Politik, Agon Maliqi, ka pyetur në Facebook se pse Kosova nuk ka angazhuar kompani lobimi në Uashington të ShbA-së dhe në kryeqendrat e mëdha, transmeton Paparaci.
Ai tha se ato luajnë rol shumë të rëndësishëm. Shtoi se “mbështetësit e Kosovës shumica angazhohen vullnetarisht dhe as nuk konsultohen prej qeverisë sonë”.
“Para disa vitesh Kosova në Uashington e ka pasur rrjetin më aktiv dhe efektiv të mbështetësve prej gjithë vendeve të Ballkanit – aq sa shumë shtete fqinje na kanë pasur lakmi për qasjen te vendimarrësit. Sepse ashtu funksionon ai qytet politik”, shkroi ai në Facebook.
Sipas tij, tash në ShBA po dominon Serbia sa i përket mjeteve të shpenzuara për lobim, duke përmendur kështu stafin e madh të ambasadës serbe.
“Sot atje për nga mjetet e shpenzuara për lobim dominon Serbia, Gjuriq edhe ambasadën e ka shumëfishuar me staf, ndërsa mbështetësit e Kosovës shumica angazhohen vullnetarisht dhe as nuk konsultohen prej qeverisë sonë. A vjen kjo qasje prej neglizhencës, injorancës apo është e qëllimshme? Prej bindjes naive se Kosovën e çojnë përpara argumentet e forta morale? Sidoqoftë, mos u habisni pastaj se “po na keqkuptojnë” kur shumicën e plagëve i shkakton Kosova vetë”, shtoi ai.