Autoritetet shëndetësore libiane kanë nisur dezinfektimin e zonave të goditura nga përmbytjet në qytetin lindor të Dernas, pas ngritjes së shqetësimeve për mundësinë e përhapjes së sëmundjeve si pasojë e fatkeqësisë natyrore që la të vdekur mbi 11 mijë banorë.
Në kuadër të këtij operacioni janë angazhuar automjete të posaçme që kanë lëshuar nëpër rrugë gaze dezinfektuese. Ndërkaq, ekipet e kërkim-shpëtimit janë ende duke i vazhduar operacionet e gjetjes së të mbijetuarve të mundshëm nëpër zona të përbaltura e gërmadha të godinave të rrënuara.
Gjysmëhëna e Kuqe ka konfirmuar se numri i të vdekurve deri më tani është mbi 11 mijë e 300.
Autoritetet dhe grupet humanitare kanë ngritur alarmin për rrezikun e përhapjes së sëmundjeve që e kanë burim nga ujin.
Haider al-Saeih, drejtues i qendrës libiane për luftimin e sëmundjeve ngjitëse, ka bërë të ditur se deri më tani të paktën 150 njerëz kanë shfaqur simptoma të diarresë pas konsumimit të ujit të kontaminuar në Derna.
Ai u bëri thirrje banorëve që të mos pinë ujë nga rubinetet, por vetëm atë që u ndahet nëpër shishe, si pjesë e përpjekjeve të ndihmës.
Ndërkaq, prokurori i Përgjithshëm i Libisë, al-Sediq al-Sour, ka bërë të ditur se janë iniciuar hetimet rreth shembjes së dy digave të qytetit që ishin ndërtuar në vitet 1970, sikurse edhe për ndarjen e fondeve të mirëmbajtjes.
Ai ka njoftuar se nën hetim do të jenë autoritetet lokale në Derna, sikurse edhe qeveritë e mëparshme.