Deputeti i PDK-së, Bekim Haxhiu thotë se fitoren e Kosovës e mbuloi balta në stadiumin “Fadil Vokrri”. Sipas tij, kjo është situata reale e investimeve në sport e ministrit Hajrullah Çeku.
Haxhiu përmes një reagimi thotë se Qeveria duhet të përgjigjet për ndalimin e investimeve e që si pasojë futbollistët tanë luajnë në fushë me baltë.
“Të dështuarit në krye të shtetit, të dështuarit në krye të FFK-së kanë krijuar lidhje simbioze të dështimit, mashtrimit e abuzimit”, shkruan ai.
Shkrimi i plotë:
Fitoren e Kosovës e mbuloi balta në Stadiumin “Fadil Vokrri”.
Kjo është situata reale e investimeve në sport e Hajrullah Çekut.
Propaganda mashtruese u tretë në baltë dhe kushte të pafavorshme për lojë.
Pas tri viteve Qeveria duhet të përgjigjet:
Përse e ndalen Projektin e Stadiumit Nacional?
Përse i ndalen investimet në Stadiumin Olimpik “Adem Jashari” në Mitrovicë?
Përse i ndalen investimet në stadiumet e Gjilanit, Gjakovës, Pejës, Ferizajt…?
Për shkak të dështimit të Qeverisë dhe ndaljes së investimve për inate politike e regjionale, futbollistët tani luajnë në fushë me baltë.
Ndërsa për popullizëm kryeministri vrapon për ta parë lojën në “Air Albania”. Të paktën ta merrte model për investime, por jo buxheti nuk po shfrytëzohet për investime kapitale.
Të dështuarit në krye të shtetit, të dështuarit në krye të FFK-së kanë krijuar lidhje simbioze të dështimit, mashtrimit e abuzimit.
Nuk janë të vetëdijshëm çfarë dëmi kanë shkaktuar: gjenerata e futbollistëve që mund të na kualifikonte në Kampionatin Evropian përfundon në baltën e stadiumit “Fadil Vokrri”
Dështim total…!!!