Izraeli u mposht të dielën nga Kosova në Prishtinë.

Golin e vetëm të ndeshjes e shënoi Milot Rashica në minutën e 41-të.

Pas rezultatit të fiksuar në stadiumin “Fadil Vokrri” në Prishtinë, kombëtaret e Rumanisë dhe Zvicrës ndërmorën një hap të rëndësishëm për t’u kualifikuar në turneun final të EURO 2024.

Gazetarët nga Zvicra u shprehën të ekzaltuar me rezultatin e ndeshjes në Prishtinë mes Kosovës dhe Izraelit, pasi lehtëson kualifikimin e ekipit të drejtuar nga Murat Yakin për EURO 2024.

Konkretisht, zviceranët kualifikohen matematikisht në turneun final nëse mposhtin Izraelin.

“Falë fitores së Kosovës kundër Izraelit, Zvicra mund të kualifikohet matematikisht në EURO të mërkurën. Kombëtarja e Zvicrës ka shansin që t’i afrohet fazës finale të preliminareve me më shumë qetësi sesa pritej. Dështimi i Izraelit përmirësoi situatën tonë në grup”, kanë shkruar gazetarët zviceranë të SRF Sport.