Presidenti i Francës, Emmanuel Macron, gjatë qëndrimit të tij në Lozanë, ka takuar presidentin e Konfederatës Zvicerane, Alain Berset. Në takimin që dyshja zhvilloi me studentë të Universitetit të Lozanës u përmend edhe Kosova.

Nga audienca, Macron u përball me pyetjet për tensionet në Kosovë.

“Janë qetësuar paksa tani”, tha Macron, duke nënvizuar shpresën e tij se liderët e dy vendeve, do të pranojnë planin.

Megjithatë, presidenti francez frikësohet për konflikte ndëretnike që po zhvillohen nëpër pjesë të ndryshme të botës.

“Jam i shqetësuar, por nuk jam i shqetësuar për rifillimin e konfliktit në Kosovë”, deklaroi Macroni.

Gjatë kohës sa po mbahej ky takim, para ndërtesës u zhvillua një protestë pro-palestineze. Policia bllokoi turmën.

Gjithashtu, gjatë të enjtes, në Bruksel po zhvillohen takime të ndara në nivel kryenegociatorësh me emisarin special të BE-së për dialogun, Miroslav Lajçak.

Zëvendëskryeministri i Kosovës, Besnik Bislimi dhe shefi i të ashtuquajturës “Zyrë për Kosovën” në qeverinë e Serbisë, Petar Petkoviq janë takuar ndarazi me emisarin Lajçak.

Nuk dihet nëse këto takime kanë prodhuar kushtet e nevojshme për një takim trepalësh. /Paparaci.com/