Trajneri i Llapit, Tahir Bataina dha një deklaratë interesante sot pas fitores ndaj kampionit në fuqi të Kosovës, Ballkanit, që sipas të gjitha gjasave i është adresuar kryetarit të FFK-së, Agim Ademit.
Pas fitores me rezultat 5:3 ndaj liderit të Superligës së Kosovës, Batatina ka thënë se ka qenë i motivuar për këtë ndeshje nga një njeri, të cilit nuk ia ka përmendur emrin.
Sipas aludimeve, Batatina i është drejtuar me deklaratën e tij kryetarit të FFK-së, Agim Ademit.
Një ditë më parë, Agim Ademi ishte pyetur rreth kandidatëve për pozitën e trajneri te Përfaqësuesja e Kosovës, në mesin e të cilëve është edhe Tahir Batatina, por deklarata e Ademit duket se nuk i ka pëlqyer trajnerit llapjan.
“Kosova nuk është në pozicion për të provuar gjëra”, kishte thënë Ademi lidhur me kandidaturat e trajnerëve kosovarë për pozitën te Përfaqësuesja e Kosovës.
Pas fitores ndaj Ballkanit, Batatina i është kundërpërgjigjur Agim Ademit duke thënë se nuk është trajner i provave.
“E dinë krejt kush më ka motivuar. Batatina nuk është trajner i provave, unë jam trajner i dëshmuar”, deklaroi Batatina, duke nxitur zërat për një prishje të raporteve mes tij e kryetarit të FFK-së.
Batatina e kishte shprehur hapur kandidimin e tij për të marrë drejtimin e Përfaqësues së Kosovës. Ai kishte deklaruar se do të punojë pa pagë për Kosovën, madje ka bërë zotime edhe për kualifikim në kampionatin e ardhshëm, çoftë ai Evropian apo Botëror.
Çështja e emërimit të përzgjedhësit te Kosova ka zgjuar interesim të madh në opinionin kosovar. FFK-ja ka hapur konkursin tash e sa javë, ndërsa i pari i saj kishte deklaruar ditë më parë se kanë kandiduar rreth 26 trajnerë./Paparaci