M.K., ish-shef i Departamentit të Teknologjisë Informative në Agjencinë Kosovare për Inteligjencë, dyshohet se shpërndau informata të klasifikuara tek një grup i dyshuar kriminal, ka mësuar Paparaci nga burime brenda AKI-së.
Siç njoftoi sot Prokuroria e Shtetit, M.K. u arrestua sot nën dyshimin për cenim të sigurisë së Kosovës.
I arrestuari për kryerjen e pesë veprave penale që ndërlidhen me keqpërdorim të detyrës zyrtare e zbulim të informatave të klasifikuara, dyshohet t’i ketë ofruar informata të klasifikuara një grupi të dyshuar kriminal, i cili është nën hetime nga Prokuroria e Shtetit, raporton Paparaci.
Ish-punononjësi i AKI-së, siç ka mësuar Paparaci nga burime të mirëinformuara brenda organeve të sigurisë, ka informuar grupin e dyshuar kriminal lidhur me përgjimet e realizuara nga organet shtetërore në hetim të grupit.
“Ka informuar edhe vëzhgimet e realizuara nga organet shtetërore të sigurisë ndaj tyre grupit të dyshuar kriminal [v.j]”, ka thënë ky burim për Paparacin.
Përmes një njoftimi për media, Prokuroria e Shtetit, të enjten bëri me dije se i arrestuari dyshohet për kryerjen e pesë veprave penale.
“…sot është arrestuar dhe ndaluar personi me inicialet M.K., ish-punonjës i AKI-së, pasi ekziston dyshimi i bazuar se i njëjti, në cilësinë e personit zyrtar, ka vepruar me motive të dyshimta, duke keqpërdorur pozitën zyrtare dhe zbuluar informacion të klasifikuar, andaj me këto veprime dyshohet se personi i lartcekur ka cenuar sigurinë e Republikës së Kosovës”, thuhet në njoftim.
Me vendim të prokurorit të rastit, i dyshuari do të mbahet në ndalim për 48-orë. /Paparaci