Për herë të parë në histori tri gjyqtare kryesore dhe tri asistente do të ndajnë drejtësinë në Kampionatin Botëror për meshkuj.
Stephanie Frappart e kishte thyer akullin në Evropë duke u bërë referja e parë femër që e drejtoi një ndeshje të Ligës së Kampionëve dhe një të kualifikimeve të Evropianit, ndërsa gjithashtu ka drejtuar takime edhe në Ligue 1, të gjitha këto në konkurrencën e meshkujve.
Krahas referes franceze, Salima Mukansanga nga Rwanda dhe Yoshimi Yamashita nga Japonia, po ashtu do t’i drejtojnë ndeshjet në “Katar 2022”, i cili do të nisë më 21 nëntor dhe do të mbyllet më 18 dhjetor të këtij viti.
Ndërkaq, referet-asistente do të jenë Neuza Back (Brazil), Kathryn Nesbitt (SHBA) dhe Karen Diaz Medina (Meksikë).
“Kjo e përmbyll një proces të gjatë, i cili kishte nisur vite më parë me zhvillimin e referimit të femrave në turnetë e juniorëve dhe të seniorëve, të organizuara nga FIFA”, ka thënë shefi i Komitetit të Referëve të FIFA-s, Pierluigi Collina.