Njëri prej të dyshuarve kryesor për plaçkitjen e armatosur në shtëpinë e sulmuesit anglez, Raheem Sterling, ndodhet në arrati në Shqipëri.
E përditshmja angleze “The Sun”, ka raportuar sot se njëri prej të dyshuarve kryesor ka gjetur strehim në vendin e tij të lindjes në Shqipëri.
Sipas raportimeve, Henri Osmani, 44-vjeçar, ka hyrë në Shqipëri më 18 korrik të këtij viti.
Autoritetet angleze kanë filluar menjëherë bashkëpunimin me policinë shqiptare për kapjen e autorit, ndërkaq lidhur me këtë zhvillimi është deklaruar edhe Ministri i Punëve të Brendshme, Taulant Balla.
“Asnjë shqiptar i përfshirë në krime në Mbretërinë e Bashkuar nuk duhet të mendojë se vendi ynë është një vend i fshehtë”, ka thënë ai për “The Sun” transmeton Paparaci.
Sterling ishte detyruar të kthehet nga Kupa e Botës më herët, për shkak të plaçkitjes së armatosur në shtëpinë e tij, ku dyshohet se janë marrë gjësende me vlerë rreth 300 mijë paund.
Policia britanike ka publikuar fotot e tre të dyshuarve shqiptarë: Henri Osmani, Alfred Isufi dhe Gerard Kalaja.
Treshja shqiptare janë të lidhur edhe me 33 plaçkitje tjera, që sipas llogaritjeve kanë përfituar jashtëligjshëm një shumë prej 1 milionë paundëve.