Reperi nga Tirana, Arkimed Lushaj është dorëzuar sot në Policinë e Kosovës.
I shpallur në kërkim para tre muajve nën dyshimin për përfshirje në rrahjen e Medi Isenit, një personazhi të njohur në platformën Tok-Tok, reperi i njohur me emrin e artit “Stresi” është dorëzuar mëngjesin e së premtes në stacionin policor në Pejë, raporton portali Indeksonline.
Ai pritet të përballet me akuza për “lëndim të lehtë trupor”.
Ngjarja për të cilin dyshohet ai, bashkë me reperin Rigels Rajku – Noizy, ka ndodhur në gusht të këtij viti.
Noizy dhe Stresi dyshohen se janë përfshirë në sulmin brutal fizik ndaj Medi Isenit në 2 gusht të këtij viti në Pejë.
Të dy reperët ishin arratisur nga Kosova. Stresi ndodhej në arrati, ndërsa Noizy ishte arrestuar në Shqipëri pesë ditë më vonë.
Reperi ishte arrestuar në Shëngjin, në afërsi të Lezhës.
Ai ishte mbajtur në arrest me burg deri më 16 gusht, kur Gjykata e Durrësit e kishte liruar pasi reperi kishte ofruar dorëzani në vlerë 50 mijë euro.