Shqipe Mehmeti – Selimi tha se opozita nuk ka të drejtë të propozojë emra, qoftë të Lëvizjes Vetëvendosje, për pozitën e kryetarit të Kuvendit të Kosovës.
Deputetja e Lëvizjes Vetëvendosje është rekomanduar nga Aleanca për Ardhmërinë e Kosovës si një emër koncensual për të zhbllokuar ngërçin në themelimin e Kuvendit të Kosovës.
Por, ajo tha sot se Lëvizja Vetëvendosje tashmë e ka propozuar emrin për kryeparlamentar.
“Ne në politikë jemi për shkak se i përkasim një subjekti politik, partisë VV. E Vetëvendosje cilindo anëtarë që e propozon për cilindo post, ne i pranojmë dhe e kryejmë me nder secilën detyrë. Por këtë propozimin e AAK-së normalisht që kanë të drejtë të propozojnë, por jo në këtë rast”, tha ajo në një deklarim për portalin Indeksonline.
Sipas saj, partive opozitare u mbetet vetëm të votojnë rreth propozimit të LVV-së.
“Sepse në këtë rast i bjen që VV ta ketë propozimin për kryeparlamentar. Ne e kemi propozuar dhe tashmë e kemi propozimin dhe atë e mbështesim. Kjo është. Atyre u mbetet vetëm të votojnë për, kunder apo abstenim, siç e përkufizon dhe kushtetuta”, tha Mehmeti – Selimi.