Albulena Haxhiu mbetet kandidatura e Lëvizjes Vetëvendosje për kryetare të Kuvendit të Kosovës.
Haxhiu, kandidatura e së cilës dështoi në dy përpjekje në vazhdimet e seancës konstituive të shtunën dhe të hënën, do të propozohet sërish në vazhdimin e seancës të mërkurën.
Deputeti i Lëvizjes Vetëvendosje, Mefail Bajqinovci, tha sot se Vetëvendosje nuk ka ndryshuar qëndrim për kandidaturën për kryeparlamentare.
“Jo, jo nuk e ndryshojmë kandidaten. Mbetet Albulena Haxhiu përsëri”, tha Bajqinovci për FrontOnline të mërkurën në mëngjes.
Seanca konstituive e Kuvendit të Kosovës është caktuar të vazhdojë të mërkurën me fillim nga ora 10:00. Kjo seancë shënon përpjekjen e pestë për themelimin e tij. /Paparaci.com