Kryetari i Listës Guxo, Faton Peci tha sot se Albulena Haxhiu nuk është arsyeja e problemit të ngërçit institucional.
Pas takimit me presidenten Vjosa Osmani të enjten, Peci i bëri apel partive politike që “t’i thirrin mendjes” dhe ta mundësojnë konstituimin e Kuvendit të Kosovës.
“Shfrytëzoj rastin edhe njëherë pas takimit, me i bë apel të gjithë partive politike që t’i thirrin arsyes dhe mendjes së shëndosh dhe të mundësojnë konstituimin e Kuvendit sepse kjo është mundësia e vetme qysh ne mund ta kemi një qeveri brenda 15 ditësh, e pastaj nëse ne nuk kemi mundësi si Vetëvendosje-Guxo dhe Alternativa, atëherë do të kenë mundësinë edhe [partitë] e tjera”, tha ai.
Ai tha se çështja e emrit të të propozuares për kryeparlamentare, Albulena Haxhiut, “nuk është arsyeja e problemit”.
“Albulena Haxhiu i ka të gjitha kredencialet për të qenë kryetare e Kuvendit”, tha Peci.
Peci tha se Albulena Haxhiu e ka dëshmuar se është qytetare dhe zyrtare patriote e Kosovës.