Rrezarta Krasniqi nga radhët e LDK-së, ka kujtuar sot dhjetëvjetorin e nënshkrimit të Marrëveshjes së Stabilizim-Asociimit (MSA) ndërmjet Republikës së Kosovës dhe Bashkimit Evropian, duke e cilësuar atë si një nga arritjet më të mëdha shtetërore, të realizuar gjatë qeverisjes së LDK-së me kryeministrin Isa Mustafa.
“Sot bëhen 10 vite nga nënshkrimi i Marrëveshjes së Stabilizim-Asociimit me Bashkimin Evropian, një nga arritjet më të mëdha të Republikës së Kosovës, nën qeverisjen e LDK-së dhe Kryeministrit Isa Mustafa,” ka shkruar Krasniqi në një postim në rrjetet sociale.
Ajo ka përmendur edhe Marrëveshjen e Uashingtonit, të nënshkruar gjatë mandatit të kryeministrit Avdullah Hoti, si një tjetër hap historik në forcimin e marrëdhënieve ndërkombëtare të Kosovës.
“Sot, për fat të keq, Qeveria Kurti ka dështuar ta zbatojë frymën e MSA-së dhe ta shfrytëzojë atë për zhvillimin e vendit, duke e sjellë Kosovën nën sanksione të Bashkimit Evropian,” ka theksuar Krasniqi.
Sipas saj, LDK mbetet forca politike që ka afruar Kosovën me Evropën dhe Shtetet e Bashkuara të Amerikës, ndërsa “qeveria Kurti e ka larguar vendin nga rruga euroatlantike.”