Seanca dëgjimore ndaj të dyshuarve në rastin e keqpërdorimeve në Byronë Kosovare të Sigurimeve (BKS) është ndërprerë përkohësisht të enjten në Gjykatën Themelore në Prizren, pasi njërit prej të dyshuarve i është përkeqësuar gjendja shëndetësore.
I dyshuari ishte pjesë e grupit prej 39 personash që dolën sot para gjykatës, ku po shqyrtohet kërkesa e prokurorisë ndaj tyre.
Sipas njoftimeve nga gjykata, seanca dëgjimore ka nisur rreth orës 16:00 dhe ishte paraparë të vazhdonte deri në orët e vona të natës. Megjithatë, gjatë zhvillimit të saj është shpallur pauzë, për t’i ofruar ndihmë mjekësore njërit prej të dyshuarve.
Autoritetet nuk kanë dhënë detaje të tjera lidhur me gjendjen shëndetësore të tij, ndërsa pritet që seanca të vazhdojë pas pauzës, në varësi të rrethanave dhe vlerësimit mjekësor.