Ligjvënës amerikanë akuzojnë Departamentin e Drejtësisë (DOJ) se ka redaktuar në mënyrë të papërshtatshme dosjet që lidhen me Jeffrey Epstein përpara publikimit të tyre, në kundërshtim me Aktin e Transparencës së Dosjeve Epstein (EFTA).
Anëtarët e Kongresit nisën të hënën shqyrtimin e versioneve të paredaktuara të rreth tre milion faqeve të dokumenteve, ndërsa përfaqësuesit Ro Khanna dhe Thomas Massie thanë se emra të rëndësishëm janë fshehur pa bazë ligjore. Sipas tyre, të paktën gjashtë emra mund t’u përkasin personave të fuqishëm që potencialisht përfshihen në abuzime.
Redaktimet u vunë në qendër të kritikave edhe pas reagimit të të mbijetuarve, të cilët e cilësuan publikimin e disa të dhënave personale si “skandaloz” dhe ritraumatizues. DOJ pranoi gabime, duke i atribuar ato problemeve teknike ose njerëzore, por këmbënguli se është i përkushtuar ndaj transparencës.
Zëvendës Prokurori i Përgjithshëm Todd Blanche deklaroi se emrat e fshehur janë hequr për të mbrojtur privatësinë dhe se dokumentet e reja përputhen me ligjin. Megjithatë, Khanna dhe Massie këmbëngulin se FBI-ja i redaktoi dosjet që në mars dhe se ato ende nuk janë zbardhur plotësisht, siç kërkon ligji i miratuar nga Kongresi dhe i nënshkruar nga Presidenti Trump.