Qeveria e Kosovës ka nënshkruar marrëveshje në vlerë 6 milionë e 315 mijë euro me Bankën Evropiane për Rindërtim dhe Zhvillim me synim për investime në efiçiencën e energjisë së ndërtesave publike në Prizren.
20 për qind e shumës është grant.
Ministri i Financave, Hekuran Murati, pas nënshkrimit të marrëveshjes ka vlerësuar bashkëpunimin me BERZH-in si partner i rëndësishëm për avancimin e tranzicionit energjetik në Kosovë dhe zhvillimin e qëndrueshëm ekonomik.
Zëvendëspresidenti i BERZH-it, Alain Pilloux, u shpreh “se për një shtet i cili deri vonë nuk mund ta imagjinonte të ardhmen e energjisë pa linjit, progresi i Kosovës nuk mund të ishte më i madh se kaq”.
Projekti i cili financohet nga kjo marrëveshje parasheh implementimin e masave të efiçiencës në 100 objekte komunale, duke përfshirë kopshte, shkolla dhe qendra të kujdesit shëndetësor parësor. Masat e propozuara për efiçiencë përfshijnë përmirësimin dhe ndërrimin e sistemeve të ngrohjes, izolimin termik të ndërtesave dhe instalimin e dritareve dhe dyerve me efiçiencë të energjisë, sipas njoftimit nga Ministria e Financave.