Kryeministri Albin Kurti ka refuzuar t’i komentojë postimet e ministrit të Financave, Hekuran Murati, lidhur me veteranët e Ushtrisë Çlirimtare të Kosovës.
Disa postime të ministrit Hekurani, që i kishte shkruar kur s’ka qenë ministër, kanë filluar të shpërndahen në rrjete sociale, duke kërkuar shkarkimin e tij. Në ato postime, Murati fliste për numrin e veteranëve.
“Unë jam kryeministër por jo komentues. Komentues ka pafund; kryeministri qeverisë me vendin për çështje madhore, dhe çka shkruajnë komentuesit për tema të shumë vjetëve nuk mund të jenë temë as prioritet për mua”, ka thënë Kurti sot.
Ministri i Financave, Hekuran Murati, vite më parë si i zhveshur nga petku i ministrit, kishte bërë një mori shkrimesh rreth pensioneve të veteranëve të Ushtrisë Çlirimtare të Kosovës, raporton Paparaci.
Ai, në një postim në rrjetin social Facebook më 4 dhjetor të 2014-s, veteranët e UÇK-së i kishte quajtur “profiterë”, ndonëse kishte thënë se nuk është e përshtatshme t’i quante ata “profiterët e luftës”.
“Me ju thanë profiterë të luftës asht e papërshtatshme sepse tash s’jemi n’luftë, ama profiterë gjithsesi”, kishte thënë Murati.
Në një postim tjetër më 2016, i cili vërshoi rrjetet sociale të mërkurën, ai kishte shkruar se Kosovës po i kushtojnë më shumë veteranët se sa do i kishin kushtuar “disa mercenarë” lufte.
Ai, derisa kishte kalkuluar shifrat e pensioneve për veteranët e luftës, kishte shkruar se “këta tre muaj lufte të një ushtrie guerile donë me na dalë shumë më shtrenjtë se një ushtri e rregullt”.
Aktualisht veteranët marrin 170 euro, derisa paga minimale pritet të arrijë në 250 euro.
Pas kritikave lidhur me këtë çështje, kryeministri Albin Kurti ka thënë se veteranët mund të meritojnë edhe më shumë, porse “një herë duhet të pastrohen listat, sepse besoj nuk janë 60 mijë veteranë”.