“Është një dekadë punë që po shpaloset në këtë natë. Si fillim kam punuar me gurë të trevave tona atëherë më është dhënë mundësi që përmes një familjari, Xhevdet Gjoni, të kem edhe gurë nga pothuajse të gjitha vendet e botës”, tregon ai për KultPlus.
Për rreth katër muaj, Gjoni ka punuar intensivisht që tri forma të plisit t’i gdhendë nga gurët e mermerit që i ka marrë në Maqedoninë e Veriut. Punimet e tij prej mermeri janë rezultat i punës së tij të madhe gjatë kohës së pandemisë së koronavirusit.
“Frymëzimi për këta gurë fillon qëkur e marr gurin në formë natyrale, pastaj e shikoj dhe analizoj dhe mendoj se çfarë mundem me kriju prej atij guri. Pra merr kohë për me e gjet se çfarë mund të bëj me atë gurë bazuar në vet faktin që janë natyral dhe ata brenda kanë të krisura, ingluzione, mbeturina kështu që unë duhet ti ndaj ato në mënyrë që ta nxjerri sa më të pastër gurin dhe sa më kualitet”, tregoi Haxhi Gjoni për KultPlus.
Në mesin e punimeve të tij të ekspozuara kishte medaljone si dhe figura të tilla si “Skënderbeu”, “Koka e Shqiponjës”, “Hyjnesha në fron”, “Koka e Kalit”, “Mikelangjelo”, “Nënë Tereza” e të tjera, figura këto të farkëtuara në gurin afrikan, indian apo të Ballkanit.
Pikërisht këto figura përbëjnë edhe pullën postare të trashëgimisë kulturore e historike të kombit shqiptar prandaj edhe ekspozita mban titullin “Pullë postare”.
Në ekspozitën “Pullë Postare” e cila do të qëndrojë e hapur në Galerinë e Ministrisë së Kulturës janë ekspozuar gjithsej 25 punime përmes të cilave autori shpërfaq kreativitetin e profilit të vet si skulpturor.