Ministrisë së Financave, Punës dhe Transfereve iu kanë shfaqur disa probleme me një ish-kolonel të Ushtrisë Çlirimtare të Kosovës. Bëhet fjalë për Safet Sylën. Ai gjatë vitit 2021 u pagua nga shteti kundërligjshëm pasi nuk posedonte kontratë valide në një pozitë drejtuese në dikasterin e udhëhequr nga Hekuran Murati. Kjo ka ndodhur – në mes tjerash – për shkak të mungesës së informacioneve nga menaxhmenti i MF-së mbi krejt këtë çështje që çoi në mos-trajtimin e saj. Ndërkohë, Syla nuk ka qenë i qasshëm për Paparacin, pavarësisht përpjekjeve për ta kontaktuar.
Besfort Veseli
Gjatë vitit 2021, Ministria e Financave e ka paguar Safet Sylën në mungesë të akt-emërimit valid, pasi që kontrata e të njëjtit kishte skaduar më 31 dhjetor të 2020-s.
Ai është drejtor i Përgjithshëm në Zyrën për Çështjet e Trashëgimisë së Trupave Mbrojtëse të Kosovës (TMK), raporton Paparaci.
Syla mban këtë pozitë prej më shumë se nëntë vitesh. Zyra për Çështje të Trashëgimisë së TMK-së funksionon në kuadër të Ministrisë së Punës dhe Mirëqenies Sociale.
Në anën tjetër, sipas Zyrës Kombëtare të Auditimit (ZKA) për vitin 2021, Syla – ish-koloneli i UÇK-së, pjesë e Zonës Operative të Pashtrikut – kishte vazhduar vijueshmërinë në mënyrë të rregullt në punë, çka edhe është dëshmuar me raportet e vijueshmërisë.
Megjithatë, në raportin e ZKA-së për vitin 2021 ndaj kësaj ministrie thuhet se sipas menaxherit të burimeve njerëzore shkak i kësaj gjendje ishte fuzionimi i Ministrisë së Punës dhe Mirëqenies Sociale në Ministrinë e Punës dhe Transfereve.
Shkas tjetër është marrë edhe mungesa e informatës lidhur me këtë rast, teksa ka bërë që kjo çështje të mbetet e patrajtuar nga menaxhmenti i Ministrisë së Financave.
Kësisoj, Auditorja Gjenerale ka konstatuar se pagesa e të punësuarit dhe vijueshmëria në punë në mungesë të kontratës valide është në kundërshtim me dispozitat ligjore, duke rrezikuar në pagesa të parregullta.
Zyra Kombëtare e Auditimit ka rekomanduar “ministrin që duhet të sigurojë zgjidhjen e rastit për pozitën e lartcekur sipas kërkesave ligjore dhe në të njëjtë kohë të sigurojë se çdo pagesë bëhet në përputhje me kontratë valide”.
Paparaci ka provuar të marrë një përgjigje nga ish-koloneli Syla për këtë çështje, por i njëjti nuk ka qenë i qasshëm për mediumin.
Syla, një ish-epror i lartë i UÇK-së dhe i TMK-së, i cili qe i intervistuar 18 orë nga Gjykata Speciale më 2018, ka paraqitje tepër të rralla në mediumet vendore. Por, ai në një debat televiziv kishte thënë se nuk ekziston asnjë arkiv i luftës.
”Ne nuk kemi pasur asnjëherë arkiv të UÇK-së, nuk e di se cilat arkiva do t’i hapë kryeministri Kurti”, kishte deklaruar Syla në Debat Plus, më 10 maj.
Sipas ueb-faqes zyrtare të MPRS-së, disa prej detyrave dhe përgjegjësive të Divizionit për Çështje të Trashëgimisë së TMK-së, janë edhe propozimi apo hartimi i dokumenteve të politikave për risistemimin e ish-pjesëtarëve të TMK-së.
Numri i të punësuarve në këtë divizion sipas të dhënave publike është katër. /Paparaci.com