Kryetari i PSD-së, Dardan Molliqaj, ka thënë se në ditën e Pavarësisë së Kosovës do të gjykohet UÇK-ja.
Reagimi i tij vjen pasi kryetari i trupit gjykues, Charles Smith, njoftoi se më 17 shkurt do të mbahet seanca e radhës ndaj ish-krerëve të UÇK-së që po mbahen në Hagë.
Sipas Molliqajt, “dita e gjykimit të historisë dhe përpjekja jonë çlirimtare po përputhet ironikisht edhe me kalendarin e Gjykatës Speciale”.
“Bash ditë gjykimi, për ata që mbahen peng dhe për ne si shoqëri që deshëm çlirimin. Kjo gjykatë nuk e njeh historinë e Kosovës. Është indiferente ndaj saj. 17 shkurti për këtë trupë gjykuese është veç një ditë tjetër pune, jo etike në karrierën e tyre personale”, shkroi ai në Facebook.
“Ndërsa ata që po gjykohen politikisht dhe padrejtësisht ishin luftëtarët e vyer të çlirimit që kulmoi me shpalljen e pavarësisë së Republikës së Kosovës. 17 shkurti po merr shumë kuptime. Kësaj radhe nuk kemi festë. Kjo datë thërret për reagimin e secilit. Ata mbrojtën vendin, ne duhet t’i mbrojmë ata edhe me këtë datë”, përfundoi ish-deputeti Molliqaj.