Kryetari i Aleancës për Ardhmërinë e Kosovës, Ramush Haradinaj ka thënë se në mbledhjen e sotme të kryesisë së AAK-së, kanë diskutuar për zhvillimet politike në vend.
Ai tha se kolegët e tij politikë i ka informuar për përmbajtjen e vizitës që e ka zhvilluar në ShBA, përfshirë takimet në Departamentin e Shtetit, Senat dhe Kongres, e po ashtu edhe me përfaqësues të institucioneve tjera amerikane.
Gjithashtu, deputeti Haradinaj pati kritika ndaj Qeverisë Kurti rreth qasjes në dialog dhe raporteve me ShBA-të.
“Ishte dakordim i përbashkët që zhvillimet politike në vend janë në momentet më vendimtare për shtetin tonë. Qeveria Kurti ka dështuar në ndërtimin e një strategjie e cila do e vendoste Kosovën në pozitë të favorshme në raport me Serbinë. Moskoordinimi me aleatët tanë, veçmas me Amerikën, ka rrezikuar interesin nacional dhe gjitha të arriturat e deritanishme të shtetit”, shkroi ish-kryeministri në Facebook.
“Aleanca për Ardhmërinë e Kosovës insiston në marrëveshjen përfundimtare për njohje të ndërsjellë me Serbinë”.