“Ne me shumë vëmendje jemi duke e përcjellë situatën në Mitrovicën e Veriut. Kam parë deklaratat e presidentit Vuçiq, kryeministres Bërnabiq, të Petkoviqit, jam në kontakt me kolegët në Prishtinë, me ambasadorët e Kuintit këtu në Beograd. Të jeni të sigurt që jemi duke bërë presion të fortë ndaj Kosovës dhe se presim që njerëzit të marrin përgjegjësinë për veprimet e tyre” ka deklaruar për gazetën serbe “Novosti” ambasadori amerikan në Beograd Anthony Godfrey, transmeton Paparaci.com.
I pyetur nëse ishin të befasuar nga veprimi i Policisë së Kosovës dhe nëse ai mendon se lëvizje të tilla parandalojnë ndonjë përparim në procesin e normalizimit të marrëdhënieve, ambasadori tha se në këtë moment “nuk ka informacion të mjaftueshëm për incidentin e fundit”.
“Ka shanse të cilat duhet të përdoren për të ecur përpara. Sa më gjatë që vonohen çështjet e pazgjidhura, aq më keq do të jenë gjërat”, ka thënë ambasadori Godfrey, i cili, sipas raporteve të mediave, duhet të zëvendësohet nga Christopher Hill, i cili është një diplomat i kalitur, njohës i rajonit dhe një mik i ngushtë dhe bashkëpunëtor i presidentit amerikan Joseph Biden./Paparaci.com.