Policia e Kosovës sot njoftoi se në orët e pasdites është intervistuar një zyrtar i Federatës së Futbollit të Kosovës.
Siç mëson Paparaci nga burimet brenda organeve të sigurisë, bëhet fjalë për Agim Gashin.
Gashi mban pozitën e kontablistit brenda shtëpisë së futbollit kosovar. Në anën tjetër, ai pas intervistimit në stacionin policor është liruar me urdhër të prokurorit të rastit.
Ndërkohë, Policia po ashtu tregoi se kryetari i FFK-së, Agim Ademi, nuk është arrestuar dhe nuk ka urdhër-arrest ndaj tij.
Por të njëjtit, siç bëri të ditur Policia me anë të një komunikate, i është lënë një ftesë për t’u paraqitur në polici për intervistim.
Bazuar në komunikatën e PK-së, intervistimi ndaj Ademit do të zhvillohet të mërkurën, transmeton Paparaci.
“Policia e Kosovës, sot në orët e pasditës ka intervistuar në stacion policor një person/zyrtar të Federatës së Futbollit të Kosovës, i cili pas intervistimit me urdhër të prokurorit është liruar”.
“Ndërsa raportimi në media për kinse arrestimin e kreut të FFK-së nuk qendron dhe se nuk ka ndonjë urdhër arrest siq raportohet, por të njëjtit i është lënë një ftesë për tu paraqitur në polici për intervistim gjatë ditës së nesërme. Të gjitha veprimet e mëtejme do të ndërmerren në bashkëpunim dhe koordinim me organet e drejtësise”, thuhet në kumtesën e PK-së.