Blerim Vela, shefi i stafit në kabinetin e presidentes Vjosa Osmani, ka bërë një reagim sërish pasi tha se raportimet e medieve të Kosovës “janë pjesë e luftës speciale të realizuar sipas skemës së përgatitur nga Beogradi dhe të realizuar përmes kriminelëve të veriut dhe sekserëve të tyre, të cilët ndodhën në listën e zezë të SHBA-së”.
Deklarata e tij ndërlidhet me raportimet se Gjykata Kushtetuese mund ta rrëzojë presidenten Vjosa Osmani.
Këtë gjuhë, Asociacioni i Gazetarëve të Kosovës e ka cilësuar si të papranueshme dhe shumë të rrezikshme që rëndon ambientin e punës së gazetarëve në Kosovë.
Më pas, Vela tha se reagimi i tij ka të bëjë me shpërndarësit e dezinformatave, por jo me mediat.
“Media të nderuara, reagimi im ka të bëj me shpërndarësit e dezinformatave, porse jo me mediat, të cilat e kanë të drejtën e tyre për raportim të lirë. Mediat e lira janë themel i demokracisë. I inkurajoj që ta zbërthejnë mëtej kush janë porositësit e dezinformatave”, shkroi ai në Twitter.