Ministria e Punëve të Jashtme dhe Diasporës në Kosovë, ka bërë të ditur sonte se për shkak të protestave, serbët kanë bllokuar rrugën magjistrale në pjesën e Serbisë.
Bllokimi është duke ndodhur pas pikës kufitare në Jarinje dhe në Merdare. Rrjedhimisht, serbët kanë pamundësuar futjen e kamionëve dhe autobusëve.
Ndërkohë, ministria e Jashtme tha se nuk është i sigurt për momentin as kalimi i veturave, transmeton Paparaci.
Për shkak të situatës së krijuar, MPJD u ka bërë thirrje qytetarëve që t’i përdorin pikat kufitare në Mutivodë, Dheu i Bardhë apo rrugët përmes Maqedonisë Veriore. Këto rekomandime tashmë kanë filluar të gjejnë zbatim nga ana e qytetarëve të Kosovës.
Kjo pasi disa fotografi kanë arritur në redaksinë e Paparacit, ku shihet se disa autobusë e bashkë me automjete të tjera tani po kalojnë kah Dheu i Bardhë, si rrugë alternative.
“Ju njoftojmë se ne territorin e Serbisë, në afërsi të pikave kufitare në Jarinjë dhe në Merdare, për shkak të protestave që po mbahen, nuk është i mundur kalimi i autobusëve dhe kamionëve që vijnë nga Kosova. Nuk është i sigurt për momentin as kalimi i veturave”, thuhet në komunikatën e MPJD-së
Paparaci raportoi sonte se disa serbë i kanë bllokuar rrugët në drejtim të pikave kufitare nga Serbia për në Kosovë.
Disa qytetarë, kanë treguar për Paparacin se në pikë-kalimin kufitar në Merdare, serbët nuk kanë lejuar të hynë autobusët dhe disa automjete prej Kosovës.