Presidentja Vjosa Osmani ka ftuar të enjten në takim individual secilin nga krerët e subjekteve politike parlamentare.
Si përgjigje ndaj propozimit të kryetarit të AAK-së, Ramush Haradinaj, për aktivizimin e presidentes në përpjekje për të zgjidhur krizën në veri, shefja e shtetit ka vendosur të ftojë në takim kryetarët e partive politike në vend.
Të enjten, në seancën e Kuvendit të Kosovës, Ramush Haradinaj kërkoi edhe publikisht nga presidentja Osmani që të thërrasë një takim me dyer të mbyllura të krerëve institucional dhe atyre opozitarë.
Kërkesa e Haradinajt ndërlidhet me zhvillimet shqetësuese në raport me marrëdhëniet e Kosovës me partnerët e saj më të mëdhenj, BE-në dhe ShBA-në.
Masa ndëshkuese janë paralajmëruar si nga BE-ja, ashtu edhe nga ShBA-ja, për shkak të veprimeve që i shohin si destruktive të Qeverisë Kurti.