Kryetari i Kuvendit, Glauk Konjufca, ka deklaruar se e dënon ashpër “sulmin terrorist dhe kriminal të strukturave kriminale të drejtuara nga Serbia nga i cili një polic mbeti i vrarë dhe një tjetër u plagos në orët e para të mëngjesit në veri të Kosovës”.
Policia e Kosovës ka njoftuar se në orët e para të mëngjesit të ditës së sotme, është vrarë një polic i Kosovës, ndërsa një tjetër ka mbetur i plagosur.
Konjufca tha se ky është një sulm i drejtpërdrejt ndaj rendit kushtetues, “ndaj veprimeve tona për rend dhe ligj dhe cenim i sovranitetit dhe sigurisë të vendit tonë”.
“Prandaj, i kërkojmë fuqishëm faktorit ndërkombëtar, veçanërisht BE-së dhe SHBA-së që ta dënojnë Serbinë për këtë agresion të hapur kundrejt Kosovës”, shkroi ai në Facebook.
“Në emër të Kuvendit të Republikës së Kosovës dhe në emrin tim i shpreh ngushëllimet më të sinqerta familjes së policit të vrarë, ndërsa policit të plagosur shërim sa më të shpejtë. Autorët e këtij krimi, urgjentisht të sillen para drejtësisë, ndërkaq i ftoj institucionet e drejtësisë të veprojnë menjëherë”.