Irlanda do t’i bashkohet kërkesës së Afrikës së Jugut për të parashtruar padi në Gjykatën Ndërkombëtare të Drejtësisë për atë që ajo thotë se është gjenocid i Izraelit në Rripin e Gazës.
Lajmin e ka bërë të ditur ministri i Jashtëm irlandez, Micheal Martin.
Siç raporton Reuters, kjo është shprehja më e fortë e shqetësimit irlandez për pasojat e operacioneve ushtarake izraelite.
Kreu i diplomacisë irlandeze tha se ndërhyrja ushtarake e Izraelit, në të cilën u vranë civilë të pafajshëm, “paraqet një shkelje flagrante të ligjit ndërkombëtar humanitar në një shkallë masive”.
Sipas tij, për këtë arsye Dublini planifikon t’i bashkohet procesit që filloi në dhjetor me dorëzimin e iniciativës së Afrikës së Jugut.
Republika e Afrikës së Jugut pretendon se veprimet e Izraelit kanë karakter gjenocidi sepse ato janë kryer me qëllimin specifik për të shkatërruar palestinezët në Gaza.
Në fund të janarit, GJND-ja lëshoi një urdhër paraprak duke urdhëruar Izraelin të ndërmarrë të gjitha hapat për të parandaluar gjenocidin dhe për të përmirësuar situatën humanitare në Rripin e Gazës. Vendimi u mirëprit nga një numër vendesh arabe dhe evropiane.
Së bashku me Spanjën, për shembull, Irlanda është një nga vendet më kritike ndaj Izraelit në Evropë. Këto vende, së bashku me Slloveninë dhe Maltën, hodhën hapin e parë drejt njohjes së shtetësisë palestineze në Bregun Perëndimor dhe Rripin e Gazës javën e kaluar.