Çekani i drejtësisë mbi vrasjen e grave

Gjykata Themelore në Pejë kishte dënuar E.L. me 100 euro gjobë dhe tre muaj burgim për dhunë në familje. Me kërkesën e E.L., dënimi me burgim ishte zëvendësuar me gjobë prej 300 eurosh.

 16 prill 2024

E premte. 14:40. Brenda Qendrës për Punë Sociale, në Ferizaj, një grua u qëllua disa herë më plumba në kokë. Edhe vëllai i saj, i mitur, u godit në krah. Për vrasjen dyshohet V.A., i cili ka bashkëjetuar me viktimën.

Gjykata Themelore në Ferizaj cakton një muaj paraburgim për të dyshuarin. Ai dyshohet edhe për armëmbajtje pa leje, me të cilën dyshohet se kreu krimin.

E mërkurë. 20:25. Brenda veturës së familjes, viktima u qëllua me një plumb në qafë. Ajo ndërroi jetë në vendin e ngjarjes.

Gjykata Themelore në Prishtinë cakton masën e paraburgimit për tre nga të dyshuarit për përfshirje në rastin e vrasjes. N.M. dyshohet se me dashje kishte privuar nga jeta bashkëshorten e tij, duke e pajisur me armë të pandehurin G.P. dhe duke inskenuar një grabitje. Bashkëshorti dyshohet se i kishte premtuar G.P. se do ta paguante 30 mijë euro për ta kryer vrasjen.

Gjykata Themelore në Prishtinë cakton masën e paraburgimit edhe për një person të katërt, i cili dyshohet se ia shiti armën dorasit.

Gjykata Themelore në Prishtinë ua vazhdon masën e paraburgimit edhe nga dy muaj të dyshuarve. Ata mbeten në paraburgim deri të paktën më 28 prill 2024.

Prokuroria Themelore në Ferizaj akuzon S.D. për veprën penale kanosje, për të cilën i pandehuri nuk pranon fajësinë.

Bashkëshortja e S.H. kërkon urdhër për mbrojtje. Për zbatimin e urdhrit të mbrojtjes, që vlente nga 13 shtatori 2022 deri më 13 mars 2023, ishin të ngarkuara stacionet policore në Shtime dhe Lipjan.

S.H. shpallet fajtor për armëmbajtje pa leje. Dënohet me gjobë prej 300 eurosh dhe i konfiskohet arma.

Mbrojtësi i S.H. kërkon hedhjen poshtë të aktakuzës.

Gjykata Themelore në Ferizaj refuzon kërkesën për hedhjen poshtë të aktakuzës.

E mërkurë. 18:00. Në oborrin e Klinikës së Gjinekologjisë në Qendrën Klinike Universitare të Kosovës, në Prishtinë, 35-vjeçarja shtatzënë qëllohet me armë, duke mbetur e vrarë.

Këshilli për Mbrojtjen e të Drejtave dhe Lirive të Njeriut (KMDLNJ) thotë se vrasja e saj ishte pasojë e drejtpërdrejtë e dështimit të mekanizmave mbrojtës të shtetit.

Pas disa ditësh në arrati, S.H. bën vetëvrasje në shtëpinë e tij.

E premte. 4:00. Në shtëpinë e saj në Prishtinë, teksa ishte duke fjetur, viktima goditet disa herë me sëpatë në pjesën e majtë të kokës. Si pasojë e goditjeve, ajo vdes.

Gjykata Themelore në Prishtinë dënon I.G. me 25 vjet burgim.

Gjykata e Apelit e kthen rastin në rigjykim me arsyetimin se në vendimin e Gjykatës Themelore të Prishtinës, kishte shkelje të Kodit Penal të Kosovës.

Në rigjykim, I.G. dënohet me 35 vjet burgim për vrasjen e bashkëshortes.

S.Q. akuzohet se, me dashje, i kishte shkaktuar lëndim trupor bashkëshortes së tij. Pas mosmarrëveshjeve të vazhdueshme, ai thuhet se kishte marrë një çarçaf dhe e kishte shtrënguar me të në fyt bashkëshorten e tij.

S.Q. akuzohet se kishte ushtruar dhunë psikike ndaj bashkëshortes së tij, duke i thënë të dilte nga shtëpia, shkaku se “ajo po e tradhtonte”. Djali i tyre e kishte raportuar rastin në polici. Ai ishte dërguar në stacionin policor për veprën penale “dhuna në familje”. Më vonë ishte liruar në procedurë të rregullt.

E mërkurë. 13:30. Në shtëpinë e familjes në Llaushë në Skënderaj, viktima 48-vjeçare qëllohet gjashtë herë me plumba në trup. Si pasojë e goditjeve, ajo ndërron jetë gjatë rrugës për në spitalin rajonal të Mitrovicës.

Ngrihet aktakuzë ndaj S.Q. për vrasjen e bashkëshortes me armë, për të cilën nuk kishte leje posedimi.

Gjykata Themelore në Mitrovicë dënon S.Q. me 24 vjet burgim dhe 500 euro gjobë për veprat penale “lëndim i lehtë trupor”, “dhunë në familje”, “vrasje e rëndë” dhe “armëmbajtje pa leje”.

Në Gjykatën e Apelit, për vendimin e Gjykatës Themelore ankohen edhe mbrojtësi i të akuzuarit edhe prokuroria.

Gjykata e Apelit i refuzon ankesat e palëve si të pabaza dhe vërteton aktgjykimin e shkallës së parë.

E diel. 10:56 – 14:43. Nga goditjet e shumta me shkop, si pasojë e dhunës vdes viktima 18-vjeçare. Për vrasjen në Ferizaj akuzohen D.K, i cili jetonte me viktimën në bashkësi jashtëmartesore, si dhe A.S.

Mbahet seanca fillestare e këtij rasti. A.S. deklarohet i pafajshëm, ndërsa D.K. mbrohet në heshtje.

Avokatët e D.K. dhe A.S. kërkojnë hedhjen poshtë të aktakuzës.

Konfirmohet aktakuza, pasi gjyqtari i rastit, Sahit Krasniqi, refuzon kërkesën për hedhje poshtë të aktakuzës.

Gjyqtari Sahit Krasniqi aprovon propozimin për ekzaminimin psikiatrik të D.K. Raporti i Institutit të Forenzikës konstaton se ai nuk ka ndonjë çrregullim apo sëmundje mendore psikotike.

D. K. sërish mbrohet në heshtje.

Jepen fjalët përfundimtare. Avokati i familjes së 18-vjeçares së vrarë kërkon dënim maksimal, ndërsa avokati i D.K. thotë se, kur të merret vendimi për dënimin, duhet të merret parasysh që “vepra penale është kryer nën ndikimin e lëndëve narkotike”.

Shpallet aktgjykimi. D.K. dënohet me burgim të përjetshëm, ndërsa A.S. dënohet me 15 vjet burgim për vrasjen e viktimës. Ata lirohen nga akuzat për dhunim dhe ndihmë në kryerjen e dhunimit.

Seancë në Gjykatën e Apelit për t’i shqyrtuar ankesat e palëve ndaj vendimit. Pala e dëmtuar kërkon që dënimi për A.S. të rritet në 25 vjet apo burgim të përjetshëm.

Gjykata e Apelit e kthen çështjen në rigjykim ndaj të akuzuarve D.K. dhe A.S., për shkelje të procedurës penale.

L.S. raportohet për dhunë në familje.

S.M. nuk paraqitet për t’u intervistuar në stacionin policor.

Nuk ndërmerret asnjë veprim hetimor apo veprim tjetër për ta zbardhur rastin apo për ta mbrojtur S.M. Ish-bashkëshorti i saj lirohet në procedurë të rregullt.

E diel. Rrugës për në punë, S.M. vritet me armë zjarri. I dyshuari për vrasjen e saj, ish-bashkëshorti, vret veten.

Vajza e viktimës dorëzon në Gjykatën Kushtetuese të Kosovës kërkesën për konstatim se mosveprimi i institucioneve shtetërore kishte shkelur të drejtën për jetë të nënës së saj.

Gjykata Kushtetuese e Kosovës konstaton se viktimës i ishte mohuar e drejta për jetë. Sipas vendimit, vrasja e saj erdhi si pasojë e neglizhimit të rastit nga Prokuroria Themelore në Prishtinë dhe Stacioni Policor në Graçanicë.

Këshilli Prokurorial i Kosovës dënon prokuroren e rastit, Hava Krasniqi, me zvogëlim të pagës për 30 për qind për një vit, pasi thuhej se ajo nuk e kishte vlerësuar rrezikshmërinë për të marrë veprime urgjente. Sipas vendimit, prokurorja kishte anashkaluar faktin që i dyshuari kishte dënim për kryerje të një vepre penale në vitin 2019, kishte urdhër të mbrojtjes dhe dy deklarata të ushtrimit të dhunës ndaj viktimës.

Vendimi i Këshillit Prokurorial të Kosovës konfirmohet nga Gjykata Supreme.

E shtunë. Në shtëpinë e familjes, pas mosmarrëveshjeve, viktima goditet me një shufër metalike fillimisht në krahë, disa herë në kokë e pastaj edhe në pjesë të tjera të trupit. Edhe pasi ishte rrëzuar në tokë, goditjet vazhduan mbi trupin e saj, duke i shkaktuar plagë vdekjeprurëse. Për vrasjen dyshohet bashkëshorti i saj, N.M.

Prokuroria Themelore në Gjilan ngre aktakuzë kundër N.M.

Gjykata Themelore në Gjilan dënon N.M. me burgim të përjetshëm.

Vendimi i Gjykatës Themelore anulohet nga Gjykata e Apelit, që aprovon kërkesën e mbrojtësit të N.M. për ta kthyer rastin në rigjykim.

Gjykata Themelore në Gjilan dënon N.M. me 25 vjet burgim.

Gjykata e Apelit vërteton aktgjykimin e Gjykatës Themelore në Gjilan, pas ankesës nga ana e mbrojtësit të N.M.

E martë. Teksa po dilte nga shtëpia e familjes, viktima goditet 14 herë me plumba, në pjesë të ndryshme të trupit. Për vrasjen, të kryer me armë pa leje, dyshohet bashkëshorti i saj, B.V., i cili dërgohet menjëherë në paraburgim.

Gjykata Themelore në Prizren dënon B.V. me burgim të përjetshëm.

Gjykata e Apelit, pas ankesës së mbrojtjes së B.V., kishte zbutur dënimin nga burgim i përjetshëm në 25 vjet burgim.

Gjykata Supreme vërteton vendimin e Gjykatës së Apelit për zbutje të dënimit.

E premte. 17:30. Pas një mosmarrëveshjeje, I.H. ndalon veturën në dalje të fshatit Samadraxhë të Suharekës dhe dyshohet se e kishte nxjerrë me forcë bashkëshorten e tij nga vetura. Ai dyshohet se e kishte grushtuar viktimën dhe më pas e kishte kapur për koke, duke e goditur për asfalt. Pas gjakderdhjes, si pasojë e lëndimeve, viktima vdes në QKUK në Prishtinë.

Gjykata Themelore në Prizren dënon I.H. me 15 vjet burgim.

Gjykata Supreme e kthen rastin në rigjykim.

Gjykata Themelore në Prizren dënon I.H. me 15 vjet burgim. Sipas aktgjykimit, ndër të tjera, I.H. detyrohet të paguajë 50 euro për kompensim të viktimave të krimit.

Gjykata e Apelit vërteton vendimin e Gjykatës Themelore të Prizrenit.

E martë. Në shtëpinë e familjes, viktima dhe vajza e saj vriten pasi qëllohen me armë. I dyshuar për vrasjen është bashkëshorti P.N.

Gjykata Themelore në Gjakovë dënon P.N. me 24 vjet burgim.

Gjykata e Apelit ndryshoi vendimin e shkallës së parë dhe e dënoi P.N. me burgim të përjetshëm.

Gjykata Supreme e Kosovës e kthen rastin në rigjykim.

Shtyhet shpallja e aktgjykimit ndaj P.N. Nuk arrihet të sigurohet prezenca e të akuzuarit, i cili ishte në paraburgim.

Në rigjykim, P.N. dënohet me 24 vjet e gjashtë muaj burgim.

P.N. kërkon nga Apeli uljen e dënimit apo rigjykim. Prokuroria kërkon burgim të përjetshëm.

Gjykata e Apelit ashpërson dënimin ndaj P.N. në 30 vjet burgim.

E premte. Në shtëpinë e familjes, viktima theret 21 herë me thikë. Lëndohet edhe vajza e saj, e cila kishte tentuar të mbrojë nënën. Për vrasjen akuzohet bashkëshorti i saj, N.B.

Gjykata Themelore në Prizren dënon N.B me 12 vjet e gjashtë muaj burgim.

Dy palët ankohen për vendimin e marrë.

Gjykata e Apelit ashpërson dënimin ndaj N.B në 17 vjet burgim.

E enjte. Viktima vdes pas tri ditësh gjakderdhje që kishte përjetuar pas martesës më 25 korrik.

I akuzuari H.Z. lirohet nga akuza se i kishte shkelur detyrimet familjare ligjore, duke e lënë në gjendje të rëndë shëndetësore bashkëshorten e tij.

Gjykata e Apelit e kthen rastin në rigjykim, pas ankesës së Prokurorisë.

Gjykata Themelore në Gjakovë dënon H.Z. me dy vjet burgim. Sipas aktgjykimit, ai detyrohet të paguajë 30 euro për kompensim të viktimave të krimit.

Viktima paraqet padi për të shkëputur martesën me A.J. Pas paraqitjes së padisë, viktima merr vajzën dhe kthehet të jetojë me prindërit e saj.

Pas kërcënimeve të vazhdueshme të pretenduara, D.K. kërkon lëshimin e urdhrit të mbrojtjes nga A.J. nga Gjykata Komunale në Prishtinë.

E martë. D.K. vdes pasi që goditet me plumb në qafë. I dyshuari për vrasjen është bashkëshorti i saj, A.J., i cili ndodhet në arrati.

Prindërit e D.K. padisin Këshillin Gjyqësor të Kosovës, Gjykatën Themelore dhe Republikën e Kosovës dhe kërkojnë kompensim për vrasjen.

Gjykata Kushtetuese e Kosovës gjen shkelje dhe mban përgjegjëse Gjykatën Komunale të Prishtinës për shkelje të të drejtave të njeriut.

Pas një procesi të gjatë gjyqësor, Gjykata e Apelit vendos që prindërve të D.K. t’ua kompensojë shumën prej 30 mijë eurosh.