Gazetari Vehbi Kajtazi e ka cilësuar ‘krejtësisht të anti-kombëtar dhe të dyshimtë’ angazhimin e kryeministrit Albin Kurti në zgjedhjet në Maqedoninë e Veriut.
Kajtazi ka thënë sot se pozicionimi i kryeministrit të Kosovës kundër Ali Ahmetit, liderit të Bashkimit Demokratik për Integrim, është i gabuar.
“Angazhimi i Kurtit është krejtësisht i dyshimtë dhe antikombëtar. Pse? Sepse Ali Ahmeti është njëri prej udhëheqësve te luftës për çlirimin e Kosovës. Sepse Ali Ahmeti kurrë nuk kërkoi dhe nuk mori asgjë nga Kosova për shërbimin që i bëri për liri dhe pavarësi”, ka thënë Kajtazi.
“Sepse Ali Ahmeti bëri më shumë për Kosovën sesa krejt këta që udhëheqin Kosovën këto tri vjet e fundit”, ka thënë ai.
Kajtazi ka deklaruar se Ali Ahmeti mund të mos jetë i mirë vetëm për maqedonasit, e jo për shqiptarët.
“Siç e theksova, votuesit shqiptarë në Maqedoni të Veriut kanë të drejtë të zgjedhin këdo. Por para se ta bëjnë ketë duhet të mendojnë mirë se a janë për zhvillim e përparim, apo për diskriminim dhe izolim”.
“Ali Ahmeti mund të mos jetë i mirë vetëm për maqedonasit, kurrsesi për shqiptaret.
Pozicionimi i Kurtit ne raport me Ali Ahmetin, është akt kundër interesave te shqiptarëve në Maqedoni. Kështu do të duhej ta shihnin votuesit atje”, është shprehur ai.