Rektori i UP-së mori vendim për pezullimin nga puna të profesori Xhevat Krasniqi me efekt të menjëhershëm.
Në një njoftim për media, Universiteti i Prishtinës tha se pezullimi nga puna i profesorit vlen derisa të përfundojnë veprimet hetuese nga ana e Prokurorisë se Shtetit.
“Mbi bazën e vendimit të Këshillit të Etikës dhe rekomandimit drejtuar Rektoratit, Rektori i UP-së mori vendim për pezullimin nga puna të Prof. Xh.K., me efekt të menjëhershëm, sipas kornizës normative përkatëse, derisa të përfundojnë veprimet hetuese nga ana e prokurorisë se shtetit”, thuhet në njoftimin e UP-së.
Për këto dhe çështje të tjera të vendosura, Këshilli i Etikës do të nxjerrë vendim me shkrim, i cili do t’u komunikohet palëve gjatë ditëve në vijim”, thuhet në njoftim.
Po ashtu, në njoftim bëhet e ditur se Këshilli i Etikës i Universitetit të Prishtinës refuzon sulmet brutale nga persona brenda dhe jashtë UP-së dhe “kërkon përmbajtje dhe rezervim nga çfarëdo ndërhyrje dhe sulm ndaj UP-së, sidomos nga vetë anëtarët e stafit të UP-së”.
Profesori i UP-së po akuzohet nga 27 studentë për ngacmim seksual.
Krasniqi, i cili është profesor i matematikës në Fakultetin e Edukimit, ka dëshmuar të hënën para Këshillit të Etikës së Universitetit të Prishtinës.
Profesori i ka hedhur kategorikisht poshtë akuzat për ngacmim seksual të mbi 25 studenteve.
Ai ka thënë se studentet e kanë bërë denoncimin për shkak të dështimit për të kaluar provimin. Ka thënë se “të gjitha shprehjet në ankesë janë shpifje”.